اللهجات الفلسطينيه واختلافها حسب المناطق

اللهجات في فلسطين بتختلف من بلد للتاني
وانا من هواة هاي الشغلات ..
اسمع لهجات واقلدها

جبتلكم اليوم شوية كلمات تشوفوا الفرق في اللهجات من منطقه للتانيه
وكلها لهجات فلسطينيه

أسماء الإشارة
هذا:
انا بقول هذا
بمناطق تانيه
هادا هاظا هاضا هاض
هذه :
هاي
هادي هاظي
هؤلاء:
هَذولَِه
هدول هظول هظولاك هدوله..هيولا
هنا :
هون.. هونة..
(المدن الفلسطينية ، الشمال ، الضفة)، هان هانة ( الساحل الفلسطيني ماعدا القطاع وبعض قرى الداخل الفلسطيني)،
هين هينة ( قطاع غزة)

الأسماء الموصوله

الذي، التي، اللذان، اللتان، الذين واللاتي
بطريقة وحدة وهي:
إللي او يللي

ضمائر المتكلم
أنا: أنا

أَنتَ:
إنتِ
أِنتَ إِنِتْ أَنتِ

أنتم:
إنتو
أنتو إنتم

أنتما
أنتو إنتم

الضمائر المتصلة
تدمج مع الفعل إللي قبلها:

قلت له:
ئُِِلتلّو
كُلتلو جِلتلو
كتبت لها: كتبتلها
كتبتلاَّ

قلت لكم/لكما

ئُولتِِِِلكو
ئُلتلكم،(قلتلكم- قلتلكو)،(كلتلكم-كُلتلكُو)
(جلتلكو-جلتلكوم).

أدوات الإستفهام
لماذا:
ليش
لشو ..علشان شو
من شان شو
ماذا:
شو ..إِيش
كيف: كِييف كِنف
متى:
وينتا
إيمتى ايميتين متى وقتيش
وكتيش

أين"
وين ..مفيش غيرها
في حدا بيقول وير ؟؟؟

مَن:
مين ..أنو
مين هذا؟؟
أنو هاض ؟؟
مين هاضا؟؟

طريقة لفظ الحروف والكلمات
في بعض المناطق اللي أهلها بقلبو القاف لكاف، ومن هاي المناطق طولكرم ، جنين ، قلقيلية، المجدل وبعض قرى يافا،وكمان قرى منطقة المثلث في فلسطين 48 ومن أمثلة هاي الكلمات :

قلم: كلم
قديم: كديم
قلقيليه: كلكيلية.

وبعض المناطق بيقلب أهلها القاف ل..
جـ أو كـَ،
ومن هذه المناطق: قرى الخليل و الرملة و بعض قرى يافا ، غزة ، دير البلح ، رفح، ومن أمثلة هاي الكلمات:

قلم: جلم
قم: جم
قال: جال

و بعض المناطق في فلسطين أهلها بقلبو القاف ل ألف مثل الجليل
القدس ، نابلس، جنين، طول كرم، الخليل ، رام الله ، بيت لحم ، حيفا ، صفد ، طبريا ، عكا ، يافا، اللد، ومن أمثلة هاي الكلمات:

قريب: أريب
عتيق: عتيىء
قم: أُوم

و بعض المناطق الفلسطينية أهلها بقلبو الكاف إلى "اتش" مثل:

منطقة رام الله والمناطق المحيطة فيها،
وكمان قرى منطقة المثلث في فلسطين 48 ومن أمثلة هاي الكلمات :

كـلـب: تشـلـب
كرسـي: تشرسـي
كبير: تـشـبير

و هناك بعض المناطق الفلسطينيةاللي بيبقي أهلها على القاف العربية مثال :
قرى شمال فلسطين مثال بعض قرى صفد و حيفا ونادراً يقلب حرف القاف إلى غين إذ يقال:

غير قادرة : مش غادرة

مش ئادره

وفي كمان مفردات متداولة في أغلب مناطق فلسطين
ولكن بتختلف من حيث التشكيل
بس يُضم الحرف الثاني في بعض المناطق مثل نابلس أو يُجر في مناطق أخرى مثل الجليل 48.
الأمثلة على ذلك:

الفرن: فرُن فرِن

حُمْر: حُمُر حُمِر

الصبْح: صُبُح صُبِح

خبز: خُبُز خُبِز

مع اختلاف بسيط في نطق الكلمات،

وفي بعض المناطق بيجروا نهاية الكلمة مثل:
منطقة الضفة الغربية، القدس، الرملة وفلسطين 48، ومن أمثلة هاي الكلمات:

طاولة: طاولي
حلوة: حلوي
موزة: موزي

و بعض المناطق بينطقو الكلمة مثل ما هي يعني بفتحها مش بجرها مثل:
قطاع غزة، الرمال، بير السبع، وأمثلة هذه الكلمات:

كنبا: الكرسي الكبير
طاولة: طاولا
حلوة: حلوَه

في منطقة غزة مثلاً بيستخدمو بعض الألفاظ المصرية مثل:

إديني: أعطيني
كده: هكذا
هيك بالجليل عرب 48
وفي مناطق بتختلف في وصف الوقت الحالي (الآن) مثال

هـسـا (غزه المثلث )، هسع ، هسعيات (في مناطق الضفة الغربية ومنطقة المثلث في فلسطين 48 ).
*إسا
في شمال فلسطين مثال قضاء صفد وحيفا

ألحين مثال معظم قرى الساحل الفلسطيني ما عدا قضاء غزة
هلئيت أو هلجيت هلئيتا في قطاع غزة
هلأ بعض المدن الفلسطينية
هأييتي الخليل
عدو ( مثال عدو جاي) اللد ، الرملة ، المجدل ، عسقلان ,يافا

قلب الهمزة إلى ياء
مائل: مايل (عرب 48 فلسطين)
ملائكة: ملايكة

قلب الهمزة إلى واو
أذن: وذن
أين: وين

قلب حرف الظاء
يقلب حرف الظاء لحرف الضاد، مثل في:

الظهر: الضهر
الظفر: الضفر
ويقلب لحرف الزين مثل في:

ظاهرة: زاهرة
ظريف: زريف

قلب حرف الذال
قلب حرف الذال لحرف الزاي مثل،:
استاذ: استاز،
مذلة: مزلة

قلب حرف الذال لحرف الظاء
هذا: هاظا

قلب حرف الذال إلى حرف الدال،
هذا: هادا

قلب حرف السين
بينقلب حرف السين إلى حرف الصاد مثل:
رأس: راص: فستان: فصطان
او متلي بقول فستيان

قلب حرف الضاد
بينقلب حرف الضاد لظاء مثل:
ضرب: ظرب، ضبع: ظبع

كلمات بتستخدم في البيت الفلسطيني
الليوان: المجلس
السْـكملة: الطاولة الصغيرة
الشحَّاطة: الكبريته
مغرفة: أداة لسكب الطعام
كفكير: لسكب الشوربة
شزلون: أي كنباية

كلمات بيستخدمها الفلسطينيه في المزرعة
الكريك: أداة لنقل الرمل

الشنشرة: أداة لقص الحشيش
الحاكوره: قطعة أرض تحاط بسياج لمنع دخول الحيوانات
الكرم: مزرعة العنب والزيتون
البيَّارة: مزرعة الحمضيات
الجرن: مكان تجميع الشعير والقمح
سطل: دلو
الطورية : أداة للزراعة

من الكلمات الشائعة في فلسطين
نقود: مصاري
حذاء: كندرة جزمه
ملابس: أواعي أو حوايج

أخي: ياخي أو خيا أو ياخوي او اخوي
أختي: يختي أو خيتا
أمي: يمّـه
أبي: يابا
قوي: أبضاي
قوية: متيـنة
الآن: هسا،إسا، هلقيت

الكلمات اللي بترجع لأصل أجنبي
العمولة: كومسيون
النادل :جرسون
إسعاف: امبلنس

الكلمات اللي بترجع لأصل عبري
هاي الكلمات شائعة خاصة عند عرب ال48

القشدة: شـَمينِت
إشارة ضوئية: رَمْزور (جمع: رمزورات)
حاجز: مَحْسوم
هاتف نقال: بيلِفون (جمع: بيلفونات) او نيياد
كما يرام: بْسيدِر
صراف آلي: كـَسْبومات
الرخام: شايش
حاسوب: مَحشيف

منقول

كل الشكر للاخت ليدي لين على التوقيع

الله يكرمك اخي على النقل المميز

مشكوووووووووووووووور

اشكرك اخي
&BLACK CAT&
ع التوقيع رااائع

السلام عليكم
والله الموضوع اجبني كتير
بس احنا ما بنقول عن القلم جلم (اهل غزة الاصليين"مواطن")
بنقول قلم هههههههههه
وشكرا على الموضوع

شكرا ع الموضوع

بآآرك الله فيك

بارك الله بك و بالتوفيق

كل الشكر Train Heartnet XIII عالاهداء الروعة

احس ان النهاية قد اقتربت